Act 5 | MHL | STEP | Aria mua oko unuma Ananaiyas ona emeria ikos wis pun miiw ara oko sesekamik.

Acts 5

Ananaiyas emeria ikos wi aposel wia peeskimemik

1 Aria mua oko unuma Ananaiyas ona emeria ikos wis pun miiw ara oko sesekamik. 2 Nain maamuma opak nain okaiwi ona aawok. Ne ona emeria nain pun wiar amisarek. Ne okaiwi muutiw pikiwep wi aposel wapena-pa wiar wuak. 3 Naeya Pita-ke maakek, “No mua maa kookalowa-ke, naeya sira naap onan. No moram Satan kema nefa enek nain ookami Mua Maneka Ewar wiar peeskimemi miiw sesa nain okaiwi nena aawon? 4 Makena, nain nena miiwa-ke ne sesekap maamuma eliw nena iiwawun aawekan. Nain aakisa sira feenap onan nain me i miiw mua yia peeskimon, weetak. No Mua Maneka miikapura mikan.” 5 Pita muut naap maek nain Ananaiyas nan-pariw puep wakiemi iiwawun umok. Ne o umok nain emeria mua meta miimap soranep manek akena kema tootonem-ikemik. 6 Ne wi takira-ke ekapep sawi napuma nain konimiw wasiep pikiwep soopamik.

7 Ne lawisiw naap ikok Ananaiyas emeria wiar ekapok, unuma Safaira. Mua wiar umok nain me amisarek. 8 Ekapeya Pita-ke nokarek, “Ni mua ikos miiwa sesa aaweman nain muut naap-i?” Ne os-ke, “Ae, muut naap.” 9 Naap maeya Pita-ke maakek, “Aa, ni mua ikos Mua Maneka Ewar Eliwa wiar akimu naep naap onaman-i? Urufe, wi takira mua nefar umeya soopowa pikiwemik nain nan ekapemik. Ikoka nos pun naap.” 10 Naap maakeya o nan-pariw puep wakiemi iiwawun makena opak. Ne wi takir teeria nain ekapemik-na naap urufap os pun aawep pikiwep ona mua wameiya soopamik. 11 Iir nain wi Yeesus teeria unowa ne wi emeria mua papako meta miimap manek akena kema tootonemik.

Wi aposel maa miililina onamik

12 Aria wi aposel wi mua unowa mokok epa-pa Mua Maneka kekanowa-pa maa miililina onamik. Wi Yeesus opora wiar opimik nain unowiya tempel koor kemena epa okaiwi-pa wiam aawep Mua Maneka farem-ikemik, epa nain Solomon Pokow Epa naimik. 13 Mua unowa wi mua eliwa-ke wia naemik, nain wi pris woos mua wia keker opap wi Yeesus teeria wiam fiirimem-ikemik nain mamaiya me wiar ekam-ikemik. 14 Ne wia, emeria mua unowa Yeesus Krais opora wiar opap wi teeria wiar ekam-ikaiwkin teeria wiar manekarek. 15 Ne wi opora naap miimap napum mua unowa ika-pa wia wuap wia pekapep era maneka pona-pa wia wuamik, Pita soomar-ikim-ikaeya ona ama kukusa nain-ke wia nomakoweya wi sariaruk naep. 16 Ne wi owow oko sawur-ke wia anirawak nain ne napum mua wia aawep Yerusalem wia pekapemik nain unow onaiya sariarem-ikemik.

Mua Maneka ensel-ke wi aposel wia asipak

17 Aria wi pris woos mua ne wi Sadusi unow onaiya kema samor akena bagiwirap wi aposel wia opap koora-pa wia wuamik. 19 Ne uura Mua Maneka ensel-ke koora nain omopora wiar teekap wia aawep epa maneka wia porop wia maakek, 20 “Ni ikiweka, ne uuriw tempel koora ikiwep neeke wia maakeka, Yeesus nia aaweya Mua Maneka teeria-pa wiar ikowa opora nain.” Naap wia maakek. 21 Naeya wi uuriw akena ikiwep tempel koor kemena-pa wia maakem-ikemik. Aria pris woos mua-ke ona teeria unow onaiya wi Isrel woos mua, wi mua iperowa wia farep wia fiirimep aakunemik. Aakunep weesereya wi ami mua wia sesekamik, ikiwep wi aposel wia purupuk naep. 22 Ne wi ami mua koora urupemik-na wi nan me ikemik. Ne kirep ekapep wia maakemik, 23 “I iwap fuunep koor omopora urufamik-na omopora kaikap-puiwkin ikua. Ne wi ami mua neeke uuwimik nain nan iimarep ikaiwkin wia urufamik. Ne i omopora teekap wia urufamik-na mua-ko nan me ikemik.” 24 Aria naap maiwkin tempel koora ami woos mua ne wi pris woos mua kema unu-unowa wuap maemik, “Nee, wi teeria faa, kamenap aremik noma?” 25 Wi kema unowa naap wuam-ikaiwkin mua oko-ke ekapep wia maakek, “Ni miimaman-i? Wi mua koora-pa wia wuaman nain aakisa tempel koor kemena-pa opora wia maakem-ikaimik.” 26 Naap wia maakeya woos mua maneka-ke ona teeria wia aawep iwap wi aposel kekelkiya wia aawemik. Moram wi emeria mua wia keker opamik, oko nomon ika yiarikuan naep.

Wi aposel wi pris me wia keker opamik

27 Aria wi aposel wia aawep purupep wi woos mua mokok epa-pa wia iimarowiwkin pris woos mua-ke wia maakek, 28 “I iiriw opor kekanowa niemik, ‘Ni mua nain unuma-pa emeria mua opora nainiw me wia maakeka,’ naap nia maakemik. Ne weetak, ni aakisa maa onaman nain Yerusalem owowa ni opora-ke epa iiwawun aawok. Ne Yeesus ifakimemik nain i aakisa pina yiu naep oniman!” 29 Naap maeya Pita ona teeria unowiya maemik, “Ni mua-ke opora yia maakiwkin opora me niar ookiyen. Mua Maneka waisow opora yia maakiya nain opora ookiyen. 30 Yeesus nis-ke nomokow moke-pa sererimemi ifakimiwkin umok, nain Mua Maneka-ke iikirowak, eena iiriw yiena nembesir farem-ikemik nain. 31 Iikirowap ona aken ekeria-pa pokomowak, o eena yiena Maneka, yia aawow mua nain. Ne i Isrel emeria mua pina wasirkamkun os-ke pina yiar iirariya. 32 Ne i aakisa sira nain maimik, ne Mua Maneka Ewar Eliwa pun opora nain maiya, mua eena Mua Maneka opora wiar miimimik nain ona Ewar Eliwa wiiya, mua nain.”

33 Aria wi woos mua opora nain wiar miimap kema samor-ko bagiwirap wia ifakimu naep akena onamik. 34 Naap arem-ikaiwkin wi Farisi mua kuisow-ke iikirap gone-pa iimarek, mua nain unuma Gamaliel. Ne os pun wiena weke sira somek mua-ke ne mua unowa o manek akena ekima opimik. Ne os-ke wia maakek, “Wi teeria nain owaruma wia poreka,” wia naakek. 35 Wi oraiwkin wi woos mua nain wia maakek, “Aria emawik, aakisa yo efa miimeka. Ni wi mua teeria fain wia samoru naep-na baliwep kema suuwap wia samoreka. 36 Ni kema suuweka, iiriw Teudas-ke imenarep yo mua unumiya-ke wame naeya mua andet erepam o ookam-miemik. Nain o ifakimiwkin ona teeria wiar pukiwkin uuwowa nain wiar orok. 37 Ne o murarowa-pa Galili mua oko unuma Yuudas naimik nain-ke imenarek. Iir nain wi anim onoma i owow mua unuma yia aawem-ikaiwkin os-ke mua unowa wia aawep wi anim onoma wiamiya irakemik. Ne os pun naap, ifakimiwkin ona teeria wiar pukemik. 38 Naapeya yo nain naep nia maakiyem, ni wi mua sira naap nain neeke wia piipuap-pueka, ni oram mokokiw wia ikeka! Mauwowa naap nain wiena mua kema-pa ne kekanowa-pa onikuan-na wiar orainon. Ne Mua Maneka kekanowa-pa onikuan-na ni kekanep wia nomakowa nain pepek weetak. Oko naap onami Mua Maneka wameiya irakowen.” Naap wia maakeya opora wiar ookamik. 40 Ne wi aposel wia fariwkin kiiriw koor kemena urupemik. Sarua wiarep-puap wia maakemik, “Ni aakisa Yeesus unuma-pa emeria mua kiiriw me wia maakeka.” Naap wia maakep wia iirariwkin oromik. Ne maemik, “I yiena Maneka Yeesus unuma-pa yoowa aawemik nain eliw akena,” naemi kemelamik. 42 Ne wi anane tempel koora-pa wiam fiirimep yiena Maneka Yeesus opora nain wia maakemi Mua Maneka farem-ikemik. Ne iir oko wiena koora-pa naap onam-ikemik.